Un dia di famia eksitoso 2010
Fundashon Bonairiaanse Jeugdzorg ku ta trèker di siman di famia a uni huntu un biaha mas ku otro fundashonnan soshal; Sebiki, Porta Habri, Guia de famia, Voogdijraad, Fundashon Mariadal, FESBO, Jong Bonaire i FAJ a traha huntu pa bini ku siman di famia. Lema di e aña aki tabata Komunikashon ta e yabi di famia. Durante e siman di 10 pa 16 di mei por a lesa den korant artíkulo di famia ku diferente instansianan soshal a skirbi, tambe tabata tin algun hóben di Jong Bonaire ku a kontribuí i skirbi poesia bunita di famia. Tur 6 poesia tabata bunita, pero e 2 poesianan ku a hasi un impakto i a resaltá mas tabata “Pilar di un bida” skirbi pa Miangela Semeleer i tambe “Palu di famia” skirbi pa Shakira Silberie. Riba 15 di mei ku tabata dia internashonal di famia tabata tin aktividatnan kaminda ku henter famia por a bin presensia i partisipá. E dia aki a kuminsá ku un aktividat na Rincon den sentro di bario ku a wòrdu dirigí dor di Roxiana Goeloe, kaminda ku Sr. diputado Nolly Oleana tabata presente pa a habri e mainta den un forma hopi spontáneo ku un tremendo relato di su bida komo un hóben na kunuku i a splika kon e proseso di trabou di kunuku tabata. Despues a pone énfasis riba diferente ofishi ku grandinan a pasa pa yunan. Tabata tin diferente persona ku a bin papia di e konosementu ku nan a haña di nan grandinan i kon e ofishi ku nan tin aktual a pasa di bisawela pa wela, di wela pa mama, di mama pa yu. Tambe nan a duna informashon i demostrashon di nan ofishi. Tur presente a presensia maramentu di lensu, trahamentu di sòpi di yerba di hole, plantamentu i krio di bestia, trahamentu di arepa di maishi chikí i un shou di modelahe di paña nan di N&M Wilson Fashion. Despues pa parti atardi por a kontinuá ku e dia di famia na playa den aula di SGB. E aktividat na playa tabata di 5 or pa 8or. A kuminsá ku un apertura ku nos Sr. Gezaghebber Glenn Thode, nos gezaghebber a felisitá i deseá tur famia presente riba dia di famia. Pastor Andres di playa tambe a wòrdu invitá pa bin duna su bendishon na nos famianan i duna nan forsa pa sigui lucha ku otro. Pa pone shèri riba bolo e atardi ei famia nan ku tabata na SGB pa e aktividat por a partisipá i kompetí na e kues di famia. E kues a wòrdu animá pa nos kues master ku ta Sr. Aimed Ayubi ku a wòrdu asistí dor di su yu Srta. Aimee Ayubi.
Tur famia a gosa un bòl i a keda kontentu ku nan por a tuma parti na e aktividat di dia di famia, nan a siña mas kos di e kultura Boneriano i tambe di nan mes famia. Un danki di kurason ta bai na tur persona i fundashonnan soshal ku a yuda di un òf otro manera ku e aktividat, Danki na e hóben nan di Jong Bonaire pa boso aporte i ta deseá boso hopi animo i inspirashon pa sigui riba e bon kaminda di Poesia. Danki na Sr. Aimed Ayubi i su yu Aimee Ayubi. Nos spònsernan tambe nos kier a gradisí pa e konfiansa i bon koperashon; Aqua Space, City shop, Danilo Bowling, Mangrove & Kayak, Addo’s Bookstore, Scholengemeenschap Bonaire, Korant Extra, Paradise Photo, Divi Flamingo, Mi Tv, Great China, Aries Felix, Krioyo paint, Ennia i Xerox. Nos ta spera di por sigui konta ku un bon koperashon.
Siman di famia